ភ្នំពេញ៖ នៅថ្ងៃនេះមានអ្នកប្រើប្រាស់បណ្តាញសង្គមហ្វេសប៊ុកជាច្រើនបានបង្ហាញការភ្ញាក់ផ្អើល និងព្រួយបារម្ភអំពីការធ្លាក់ចំនួនអ្នកតាមដាន (Follower) នៅលើប្រូហ្វាល់ហ្វេសប៊ុករបស់ខ្លួន។ ជុំវិញករណីនេះ ក្រុមហ៊ុនហ្វេសប៊ុកបានចេញមកសុំទោសចំពោះបញ្ហានេះ ហើយក្រុមហ៊ុនកំពុងតែដោះស្រាយលើបញ្ហានេះ។

ជុំវិញនូវបញ្ហាបាត់ចំនួនអ្នកតាមដាននេះ ក្រុមហ៊ុនហ្វេសប៊ុកមិនទាន់បញ្ជាក់ឲ្យច្បាស់ពីមូលហេតុនៅឡើយទេ។ តែយ៉ាងណាអ្នកនាំពាក្យរបស់ក្រុមហ៊ុន Meta បាននិយាយដូច្នេះថា៖ «យើងដឹងថា អ្នកប្រើប្រាស់មួយចំនួនកំពុងមើលឃើញចំនួនអ្នកតាមដាន (follower) មានភាពមិនប្រក្រតីនៅលើប្រូហ្វាល់ហ្វេសប៊ុករបស់ខ្លួន។ យើងកំពុងធ្វើការងារនេះដើម្បីឱ្យអ្វីៗត្រឡប់មករកធម្មតាវិញឱ្យបានឆាប់តាមដែលអាចធ្វើទៅបាន ហើយយើងសូមអភ័យទោសចំពោះការកើតមានបញ្ហាទាំងនេះ»។

នៅព្រឹកថ្ងៃទី១២ ខែតុលានេះ អ្នកប្រើប្រាស់បណ្តាញសង្គមល្បីៗនៅកម្ពុជាដែលមានចំនួនអ្នកតាមដានច្រើនលើសលុប បាននាំគ្នាថត Screenshot បង្ហោះ ដោយប្រៀបធៀបចំនួនអ្នកតាមដានពីមុន និងបច្ចុប្បន្ន គឺមានការធ្លាក់ចុះខ្លាំង៕